2019 թվականի ընթացքում Սևանա լճից լրացուցիչ ջրառ չի իրականացվել. ՀԱՐՈՒԹՅՈՒՆ ԳՈՒԼՅԱՆ
06.02.20202019 թվականին Սևանից լրացուցիչ ջրառ չի իրականցվել՝ «Ռադիոլուրի հյուրասրահ»-ում ասել է Ջրային կոմիտեի նախագահի տեղակալ Հարություն Գուլյանը և նշել, որ ջրառը կատարվել է օրենքով թույլատրելի սահմանաչափով։
«Նպատակ ունենք բարձրացնել լճի մակարդակը․ 2019-ին ավելի շատ ջուր է լցվել Սևանա լիճ, քան բաց է թողնվել ոռոգման նպատակով», - ասել է ջրային կոմիտեի նախագահի տեղակալը՝ հույս հայտնելով, որ 2020թ-ին նույնպես լճից լրացուցիչ ջրառի կարիք չի լինի։
Հարություն Գուլյանի խոսքով՝ 2019թ-ի նույն ժամանակահատվածի համեմատ ջրամբարների լցվածությունը գրեթե նույնն է։ Ամենաշատը լցված է Կեչուտի ջրամբարը, թերի է Ազատի ու Ապարանի ջրամբարների վիճակը։
2021 թվականին կավարտվի Վեդու ջրամբարի շինարարությունը, իսկ Եղվարդի ջրամբարի համար փնտրվում են ներդրումներ․ անհրաժեշտ է շուրջ 200 մլն դոլար։
Կոմիտեն նախատեսում է պահանջվող միջոցներն ապահովել պետություն-մասնավոր համագործակցությամբ։