Ջրօգտագործողները պետք է ժամանակին վճարեն օգտագործած ջրի դիմաց
31.10.2018
«Այսօր մտահոգիչ իրավիճակ ունենք Ջրօգտագործողների ընկերություններում՝ վճարների հավաքագրման առումով։ Թերհավաքագրումները նոր խնդիրներ են առաջացնում, որոնց հետևանքներն անպայման զգում են ջրօգտագործողները։ Պետք է կարողանանք խզել այս արատավոր շրջանն ու ֆինանսական կարգապահություն ապահովել, որպեսզի ընկերությունները կարողանան բնականոն գործել։ Մենք հասկանում ենք, որ այս իրավիճակն ունի իր օբյեկտիվ և սուբյեկտիվ պատճառները, սակայն չենք կարող թույլ տալ, որ ավելի վատ վիճակում հայտնվենք։ Ջրօգտագործողների ընկերությունները պետք է օգտագործված ջրի դիմաց վճարների հավաքագրման պատշաճ մակարդակ ապահովեն»,- հայտարարել է Ջրային կոմիտեի նախագահը՝ հոկտեմբերի 31-ին Ջրօգտագործողների ընկերությունների ղեկավարների հետ կայացած հանդիպմանը։ Պետք է բացատրական աշխատանք տարվի, ճկուն մեխանիզմներ կիրառվեն, որպեսզի պարտքեր չկուտակվեն, ասել է Ինեսսա Գաբայանը։ Խոսքը հատկապես ոմանց կողմից շրջանառվող այն սադրիչ լուրերի մասին է, թե իբր պետք է վճարումներ արվեն բերքահավաքի ու բերքի իրացումից հետո միայն, կամ ոռոգումը պետք է ավելի էժան և անգամ անվճար լինի, այն դեպքում, երբ յուրաքանչյուր
տարի կառավարությունը զգալի սուբսիդիա և այլ օժանդակություն է տրամադրում ոլորտին։
Ջրային կոմիտեում կայացած հանդիպմանը մասնակցել են նաև ՋՕԸ աջակցող թիմի անդամներ, որոնք պարզաբանել են էներգետիկ և այլ ծախսերի հետ կապված մի շարք խնդիրներ։
Կոմիտեի նախագահը հանձնարարել է ընկերություններին՝ մեկ շաբաթվա ընթացքում զգալի վճարումներ ապահովել և զգուշացնել ջրօգտագործողներին, որ մեծ պարտքերի առկայության դեպքում և սպառելով նախազգուշական ժամկետները, ստիպված կլինեն դատարան դիմել։
« վերադառնալ ցանկ