Խմելու ջրի ոլորտի զարգացման հեռանկարները ՋՏՊԿ-ի և KfW բանկի քննարկումների առարկա
10.04.2016
KfW բանկի պատվիրակությունը, մասնակցությամբ խմելու ջրի հայաստանյան ծրագրերի ղեկավար տիկին Ալերո Ագբողորոմանի, ջրային գլխավոր ինժեներ Թոմաս Վոլֆի և հայաստանյան գրասենյակի պատասխանատու Զառա Չատինյանի, ապրիլի 11-ին աշխատանքային այց կատարեց ՋՏՊԿ՝ կոմիտեի նախագահ Ա. Հարությունյանի հետ քննարկելու բանկի կողմից ֆինանսավորվող ծրագրեր ընթացքը, խմելու ջրի ոլորտում մեկ վարձակալի ընտրության հետ կապված խնդիրները, բացահայտելու համագործակցության նոր ուղղություններ:
Հանդիպման օրակարգում ընդգրկված էին ջրային քաղաքականության, ինստիտուցիոնալ, ծրագրերի իրականացման հետ կապված հարցեր, այդ թվում՝
- սպասարկման տարածքից դուրս մնացած 560 գյուղերում ներդրվելիք դրամաշնորհային ծրագրի ընթացքը: Այս հարցում կողմերը համաձայնություն ձեռք բերեցին չսպասել տեխնիկակական բոլոր առաջադրանքների պատրաստման համար հայտարարված մրցույթի վերջնական արդյունքներին, այլ առաջ գնալ ըստ փուլերի՝ դրանով իսկ տնտեսելով ներդրումների համար հատկացված ժամանակահատվածը:
- KfW բանկը, կարևորելով իր կողմից կատարված ներդրումները, բնականաբար շահագրգռված է դրանց շարունակականության ապահովման խնդիրներով: Այդ նպատակով բանկը խնդրում է կոմիտեին տալ տեղեկատվություն հատկապես 2 խնդրիների վերաբերյալ.
ա) ինչպե՞ս են շարունակվելու ներդրումային ծրագրերը, ի՞նչ կառույցների միջոցով,
բ) ինչպե՞ս է իրականացվելու մեկ օպերատորի պայմանագրի կառավարման աշխատանքները, որպեսզի պահպանվի հաշվետվողականությունը, շարունակական աուդիտը, ապահովվի ներդրումների արդյունավետությունը:
Կոմիտեի նախագահ Ա. Հարությունյանը ներկայացրեց այդ ուղղությամբ վարվող պետական քաղաքականությունը և հավաստիացրեց, որ նոր մոտեցումները միտված են առավել տեսանելի արդյունքների ձեռքբերման:
Առանձին քննարկման առարկա դարձավ կոմիտեի կազմում նոր՝ գուքի կառավարման վարչություն ստեղծելու հարցը: Այս պարագայում կոմիտեին աջակցում են ինչպես KfW բանկը, այնպես և Ասիական Զարգացման Բանկը: Կոմիտեի նախագահի կողմից խնդիր դրվեց փոխադարձաբար համաձայնեցնելու գործողությունները՝ աջակցության ձևերն ու միջոցները ընտրելիս կրկնություններից խուսափելու համար:
Բանկն իր գոհունակությունը հայտնեց համայնքային զարգացման II փուլի ծրագրի արդյունքների վերաբերյալ՝ կարևորելով տնտեսված գումարների արդյունավետ օգտագործումը:
Կողմերը քննարկեցին նաև համագործակցության նոր ուղղություններ, համաձայնություն ձեռք բերեցին աշնանը կայանալիք հայ-գերմանական հանդիպման օրակարգի որոշ հարցերի վերաբերյալ:
« վերադառնալ ցանկ