ՀՀ ՏԿԵՆ ՋՐԱՅԻՆ ԿՈՄԻՏԵ

Ազդարարման
պատասխանատու
Հետևեք ձեր դիմումի
ընթացքին
Պաշտոնական էլ. փոստ
39065493@e-citizen.am
(միայն www.e-citizen.am
համակարգով ծանուցումների համար)

Հարցումներ

Ինչպե՞ս եք գնահատում ջրամատակարարման որակը Հայաստանում:

 

Տառատեսակներ

Հայաստանի Հանրապետության Կառավարության որոշմամբ հաստատված «Գրապալատ» և «Մարիամ» համակարգչային տառատեսակները:

Մամուլը մեր մասին

Ամանորին ընդառաջ պարտադիր լողում եմ Սեւանա լճում. Հարցազրույց Արամ Հարությունյանի հետ

08.01.2016 Ամանորին ընդառաջ պարտադիր լողում եմ Սեւանա լճում. Հարցազրույց Արամ Հարությունյանի հետ

 

Ջրային տնտեսության պետական կոմիտեի նախագահ, բնապահպանության նախկին նախարար Արամ Հարությունյանն Ամանորին ընդառաջ պարտադիր լողում է Սեւանա լճում: NEWS.am-ի թղթակցի հետ զրույցում Հարությունյանն ընդգծեց, որ ձմռանը Սեւանա Լճում լողալը սովորույթ է դարձել դեռ ծառայության տարիներից:

 

Ինչպե՞ս հայտնվեցիք քաղաքականության մեջ:

 

Մեր սերնդի երիտասարդության տարիները համընկան անցումային, հետո նաեւ անկախացման շրջանի հետ: Բնականաբար, ես էլ, ընկերներս էլ չէինք կարող անմասն մնալ մեր երկրում տեղի ունեցող որեւէ իրադարձությունից: Ես իմ տեսակով պրակտիկ, իրատես մարդ եմ ու ցանկացած իրավիճակից ելք որոնել չեմ խուսափում: Այդպես եղավ եւ քաղաքականության պարագայում, փորձեցի համալրել երկիրը դժվար իրավիճակից դուրս բերողների շարքերը ու հետո մնացածը գնաց, ինչպես որ պետք է գնար…

 

Պարոն Հարությունյան, արդեն 16 տարի է՝ քաղաքականության մեջ եք: Ձեր կարծիքով, ի՞նչ է փոխվել այս տարիներին քաղաքական դաշտում:

 

Քաղաքականության մեջ փոխվել է հենց բուն քաղաքականությունը, ինչը չի կարող չանդրադառնալ քաղաքական դաշտի վրա: Մենք ապրում ենք մի ժամանակաշրջանում ու մի երկրում, երբ անհնար է աշխարհում կատարվող իրադարձություններին, հատկապես գերլարված վիճակին անհաղորդ մնալ: Ուստի մեր քաղաքական դաշտը պետք է հենց այս համատեքստում դիտարկել, ընդ որում հստակ կարողանալ պատասխանել ռիսկայնության բոլոր պատճառներին եւ դրդապատճառներին: Դրական զարգացումները, երկխոսության հարթակների ստեղծումը, որոշ հարցերում հանդուրժողականության դրսեւորումները մեր քաղաքական իրականության այս 16 տարվա ձեռքբերումներից են:

 

Պատգամավոր, նախարար, մարզպետ, այսօր արդեն Ջրային տնտեսության պետական կոմիտեի նախագահ... ո՞ր աշխատանքն էր Ձեզ առավել հոգեհարազատ: Ո՞ր պաշտոնն էր ձեր խառնվածքին համապատասխան:

 

Ցանկացած աշխատանք, որն այդ պահին վստահվում է ինձ ու, որի շնորհիվ ես կարող եմ իմ լիազորությունների սահմաններում իրավիճակ շտկել, մեր երկրում ինչ-որ բան լավացնել, արդեն իսկ պարտավորեցնող է: Յուրաքանչյուր գործ, չնայած իր հանրային ու հրապարակային ընկալման, ունի իր ներքին, խոհանոցային բարդությունները: Ես աշխատող մարդ եմ, իսկ աշխատանքի հոգեհարազատության մասին երեւի կսկսեմ մտածել շատ ավելի ուշ, այն տարիքում, երբ մարդիկ սովորաբար սկսում են հուշեր գրել:

 

 

 

 

 

Ինչպիսի՞ն է Արամ Հարությունյան ամուսինը, հայրը, ընկերը: Ասում են՝պաշտոնյաները տանն այլ մարդ են դառնում, երբ փողկապով չեն:

 

Թե ինչպիսին եմ ես, կարող են ասել հենց իմ հարազատները, ընկերները: Ես միայն ասեմ, որ իմ գտածը երբեք չեմ կորցնում, ունեմ մանկության ընկերներ, աշխատանքային, բանակի, որոնց հետ մշտական կապը երբեք չեմ ընդհատում: Ինչ վերաբերում է ընտանիքիս, (ժպտում է եւ լռում-հեղ.), ընտանիքն ինձ համար ամենապատասխանատու ձեռքբերումն է: Միշտ փորձում եմ պահել խիստ հոր ու հոգատար ընկերոջ բալանսը: Այ, տղայիս հարցում դա մի փոքր չի հաջողվում: Երեւի նրանից է, որ տղայիս ու աղջիկներիս տարիքային տարբերությունը բավական մեծ է: Նա 11 տարեկան է, ինչ-որ չափով հիշեցնում է իմ մանկությունը, իհարկե փորձում եմ ուղղորդել, միասին արշավների ենք գնում, ձիավարության, քննարկում ենք ամեն ինչ, ինչն, իմ կարծիքով, կարող է հետաքրքրել այդ տարիքում: Իմիջիայլոց, հակումներ ունի էքստրեմալ սպորտաձեւերի հանդեպ, շատ է սիրում սպորտային մեքենաներ, տեսնեք, հետո նախասիրություններից որ մեկը կդառնա մշտական:

 

Նշում ենք ամենաընտանեկան տոնը: Կա՞ն ամանորյա ավանդույթներ, որոնք Արամ Հարությունյանը միշտ պահպանում է՝ անկախ զբաղեցրած պաշտոնից, ֆինանսական հնարավորություններից:

 

Ամանորին ընդառաջ սիրում եմ լինել Սեւանա Լճում: Լճում մի տեղ կա, որ մենակ ես գիտեմ, վերջերս արդեն որդիս էլ է տեղյակ: Բանակից մնացած սովորություն ունեմ, սիրում եմ ջարդել լճի սառույցն ու լողալ: Ժամանակի առումով, եթե հնարավոր է լինում սառը ջրում լողալը ձմռանը մի քանի անգամ եմ կրկնում: Նոր տարուց առաջ սակայն պարտադիր եմ լողում, երեւի հաջորդ տարին առողջ լինելու խորհրդանշական մոտեցումս է: Ի դեպ, դրան մեծ ֆինանսներ պետք չեն՝ բենզին, բահ եւ լապտեր:

 

 2015թ.-ն ինչո՞վ էր առանձնանում ձեր եւ ձեր ընտանիքի համար:

 

 Ընդհանուր առմամբ լավ տարի էր, փոփոխություններով ու զարգացումներով: Ամանորի սեղանի շուրջ երեւի կհիշենք, թե ինչ հասցրինք, ինչը մնաց հաջորդ տարի իրականացնել, այս պահին դժվարանում եմ որեւէ նշանակալի բան մտաբերել:

 

 

2016թ.-ի համար Ձմեռ պապիկից ի՞նչ եք խնդրել Հայաստանի եւ Հարությունյանների ընտանիքի համար:

 

 Ձմեռ Պապիկին չհավատալու հիմքերը շատ են, ուստի ես Աստծուն եմ խնդրում, որ խաղաղ, կայուն եւ բարեբեր տարի լինի, մեր երկրի, մեր ժողովրդի համար: Մեր ընտանիքն էլ երկրի մի մասնիկն է...

 

 

 

Սկզբնաղբյուրը՝ www.news.am կայք:

 

 

 

« վերադառնալ ցանկ
 

Վերադառնալ սկիզբ